Стала вядома пра самую дарагую кватэру, прададзеную ў Мінскай вобласці

• 12.05.2026, 10:30

Дзе яна знаходзіцца і колькі каштуе.

Жылы комплекс «Пірс» у свой час лічыўся адным з самых смелых праектаў на рынку нерухомасці Беларусі. Гэты квартал каля Мінскага мора стаў першым закрытым клубным пасёлкам па-за межамі сталіцы. Менавіта тут у красавіку прадалі кватэру, якая стала самай дарагой у Мінскай вобласці, піша Realt.by.

ЖК «Пірс» знаходзіцца на ўскраіне пасёлка Ратамка, проста праз дарогу ад Мінскага мора. Даехаць сюды на машыне можна ўсяго за 10 хвілін.

У красавіку ў адным з дамоў ЖК набылі трохпакаёвую кватэру, якая ўзначаліла топ здзелак у Мінскай вобласці. Жытло агульнай плошчай 106 квадратных метраў набылі за 430 тысяч долараў (ці 2961 долар за квадратны метр). Дарэчы, кватэра ў «Пірсе» ў доме 2019 года пабудовы абышлася пакупніку даражэй, чым самыя дарагія дамы красавіка ва ўсіх абласцях, акрамя Мінскай.

Цяпер у «Пірсе» прадаецца каля 15 кватэр.

Самы недарагі варыянт — аднапакаёвая кватэра з аздабленнем. Жытло размешчана ў маналітным сіціхаўсе на шостым паверсе. Агульная плошча кватэры з выглядам на Мінскае мора складае 33 квадратныя метры. Кватэру з мэбляй і ўбудаванай тэхнікай ацанілі ў 238 тысяч рублёў, або 85 тысяч долараў (7232 рублі, або 2576 долараў — за метр).

Адна з самых дарагіх прапаноў — пентхаус у урбан-віле. Агульная плошча гэтай кватэры складае 248 квадратных метраў. Кватэра, якая складаецца з кухні-сталовай, гасцінай і трох спален, прапануецца без аздаблення. Жытло — адзінае на паверсе, з велізарнай тэрасай.

Вышыня столяў — 3,5 метра. Кошт кватэры — 1,6 мільёна рублёў, або 590 тысяч долараў (6665 рублёў, або 2374 долары — за метр).