Чаму расійская СПА бяссільная супраць новай тактыкі Украіны?
- 12.05.2026, 17:59
Украінскі вайсковец раскрыў сакрэт.
Удары па сродках супрацьпаветранай абароны Расіі наносяцца дронамі-мідлстрайк з кампазітных матэрыялаў, якія горш выяўляюцца састарэлымі радарамі расіян, растлумачыў камандзір брыгады 412 Nemesis Павал Лакціёнаў. Акрамя таго, яны ляцяць на нізкіх вышынях і рухаюцца парамі. Дзякуючы такой тактыцы другі экіпаж можа дабіць мэту або зафіксаваць паспяховае трапленне. Якую тактыку выпрацавала брыгада Сіл беспілотных сістэм, якая ўваходзіць у топ-пяцёрку па выніковасці?
Дзякуючы выбіванню комплексаў СПА УС РФ у абароне расіян з'яўляюцца брэшы, якія можна выкарыстоўваць для дыстрайкаў і іншых аперацый, сказаў Лакціёнаў у інтэрв'ю праекту «Абаронка». Разам з тым, няма аднастайнай тактыкі: рашэнні пра далейшыя аперацыі заўсёды іншыя і становяцца нечаканасцю для праціўніка. На сёння на лініі фронту ўтварылася зона ў 200 км, у якой рэгулярна паражаюцца расійскія сродкі СПА. Дзякуючы такім рэгулярным атакам сталі магчымыя ўдары па нафтавай інфраструктуры РФ і па лагістыцы расійскай арміі.
Камандзір Nemesis распавёў, што першыя паражэнні былі нанесены звычайным цяжкім бамбавіком, які ўдарыў па ЗРК «Бук» на адлегласці 57 км ад лініі фронту. Па стане на 2 траўня гаворка ідзе пра 83 устаноўкі розных тыпаў — ад «Тор» і «Бук» да РЛС С-300. Пры гэтым пагаршэнне сітуацыі са СПА РФ адбываецца дзякуючы напрацоўкам брыгады Nemesis. Сутнасць тактыкі: па-першае, лятаць на малых вышынях, дзе БПЛА малабачныя для радароў; па-другое, «рассяваць СПА», якое вымушана змагацца з дронамі на некалькіх напрамках. Акрамя таго, задача выконваецца комплексна: спачатку разведка знаходзіць мэты, затым вайскоўцы вызначаюць прыярытэты і плануюць, далей узлятаюць ударныя экіпажы.
«Правілы гульні пастаянна змяняюцца. Штодня — трохі, штомесяц — моцна, штоквартальна — вельмі моцна, штогод — кардынальна. І з'яўленне такіх сродкаў [мідлстрайк] ужо змяніла вайну», — сказаў афіцэр.
Афіцэр патлумачыў, чаму ўстаноўкі СПА РФ не здольныя абараніць саміх сябе. Высветлілася, што ВПК РФ не паспявае кампенсаваць страты і, да ўсяго, ЗРК адцягваюць ад фронту для абароны аб'ектаў у тыле. Акрамя таго, расійская ваенная тэхніка выкарыстоўвае састарэлыя радары, якім складана заўважыць невялікую мэту з кампазітнага матэрыялу. Тым часам украінскія вайскоўцы не карыстаюцца стандартнымі атакамі. У прыватнасці, мідлстрайкі могуць выкарыстоўвацца для «адкрыцця калідораў» для дыпстрайк або для самастойных атак, але «ў розных камбінацыях, у розны час, па розных напрамках», — сказаў Лакціёнаў.
«Калі ёсць важная мэта — ад планавання да яе паражэння мінаюць лічаныя гадзіны. Адзінае, што рэальна можа сарваць такую працу, — гэта надвор'е», — адзначыў камандуючы 412-й брыгадай Nemesis.