У Германіі эвакуіруюць да 30 тысяч чалавек з-за бомбы часоў вайны

• 17.05.2026, 17:11

Яе плануюць абясшкодзіць цягам дня.

У нямецкім горадзе Пфорцгайм эвакуіруюць да 30 тыс. чалавек пасля выяўлення авіябомбы часоў Другой сусветнай вайны. Яе плануюць абясшкодзіць цягам дня, паведамляе навінавая служба Tagesschau.

Бомбу выявілі падчас будаўніцтва ў адным з раёнаў горада. З-за гэтага ўлады вырашылі эвакуіраваць жыхароў у радыусе 1,5 км ад месца знаходкі. Па маштабах гэта адна з найбуйнейшых эвакуацый у Германіі за апошнія гады, удакладняе выданне.

З раніцы паліцыя пачала абход дамоў і праверку раёна. Некаторыя жыхары не хочуць пакідаць свае кватэры, аднак улады папярэдзілі, што за гэта могуць аштрафаваць. Для эвакуацыі прыцягнулі больш за 1,5 тыс. супрацоўнікаў паліцыі, пажарных і выратавальных службаў. У горадзе таксама адкрылі часовыя пункты размяшчэння, адзін з якіх ужо апынуўся перапоўненым.

Паводле звестак сапёраў, гэта брытанская авіябомба HC 4000 часоў Другой сусветнай вайны вагой 1,8 т. Унутры ўсталяваныя тры ўзрывальнікі, якія спецыялістам належыць у хуткім часе абясшкодзіць.