У беларускіх крамах з’явіўся тамарынд

• 18.05.2026, 16:21

Што гэта за экзатычны плод і які ён на смак.

У супермаркетах Мінска заўважылі чарговы экзатычны плод. Гэта тамарынд з Тайланда, піша «Точка».

Каштуе ён 13,99 рубля (450-грамовая ўпакоўка) і 31,09 рубля (1 кг).

Плады сабралі ў сакавіку гэтага года.

Што за індыйскі фінік

Тамарынд — гэта экзатычны плод, родам з Мадагаскара, але таксама расце ў Мексіцы, краінах Паўднёвай Амерыкі і Азіі. Гэта вечназялёнае дрэва з сямейства бабовых дае плады, якія нагадваюць арахіс.

Яны карычневага колеру і выгінастай формы, маюць тонкую сухую абалонку даўжынёй да 20 см.

Спелы тамарынд, вядомы таксама як індыйскі фінік, атрымаў такую назву дзякуючы смаку і тэкстуры. Мякаць пладоў далікатная, крухмалістая. Яна мае экзатычны смак, хоць і не такі прытарны, як у фінікаў.

Спелы тамарынд мае кісла-салодкі смак, які можна параўнаць са спалучэннем чарнасліву і курагі. Яго часта выкарыстоўваюць для прыгатавання розных соусаў або як прыправу.