Расія страціла большасць міжнародных авіямаршрутаў

• 18.05.2026, 21:51

Нават у СССР іх было ў тры разы больш.

Этым летам з расійскіх аэрапортаў можна будзе вылецець прамымі рэйсамі толькі ў 31-32 краіны свету. Скарачэнне міжнародных маршрутаў звязваюць з санкцыямі, канфліктамі і крызісамі ў розных рэгіёнах.

Пра гэта паведамляе Telegram-канал «Важныя гісторыі».

Паводле звестак расійскіх тураператараў, у 1980-я гады СССР меў прамое авіязлучэнне прыблізна з 80-100 краінамі свету.

У АТОР (Асацыяцыя тураператараў Расіі) адзначаюць, што нават у часы «жалезнай заслоны» міжнародная маршрутная сетка Савецкага Саюза была значна шырэйшая, чым цяперашняя расійская.

Частка кірункаў у часы СССР лічылася ўнутранымі рэйсамі, аднак нават з улікам гэтага сучасная геаграфія палётаў РФ істотна скарацілася.

З расійскіх аэрапортаў цяпер даступныя рэйсы ў непрызнаную Абхазію, Іран, Ізраіль, ААЭ, Аман, Афганістан, а таксама ў краіны СНД і Азіі.

Сярод даступных кірункаў — Азербайджан, Арменія, Беларусь, Грузія, Казахстан, Кыргызстан, Таджыкістан, Узбекістан, Манголія, В'етнам, КНДР, Ганконг, Індыя, Інданезія, Кітай, Тайланд, Турцыя і Сербія.

У той жа час частка маршрутаў застаецца малапрывабнай для турыстаў. У расійскай асацыяцыі тураператараў прызнаюць, што рэальна запатрабаванымі могуць быць толькі каля 15 кірункаў.

Таксама варта адзначыць, што пасля санкцый і міжнародных абмежаванняў Расія так і не здолела аднавіць авіязлучэнне з Саудаўскай Аравіяй, Кувейтам, Бахрэйнам, Алжырам, Венесуэлай і Кубай.