У расійскай Пермі зладзілі крыжовы ход для абароны ад «напасці» ўкраінскіх беспілотнікаў

• 18.05.2026, 22:36

Апошнім часам у горадзе некалькі разоў абвяшчалі пра беспілотныя атакі.

Святары РПЦ 12 мая правялі ў расійскай Пермі малебен і аб’ехалі горад з абразом Божай Маці для «абароны горада» ад украінскіх беспілотнікаў, паведамляе расійскае выданне «Осторожно, новости».

«Апошнім часам у горадзе некалькі разоў абвяшчалі пра беспілотныя атакі, і каб пазбавіцца ад гэтай напасці, Кіраўнік Пермскай мітраполіі правёў малебен», — заявілі ў епархіі.

Яны сцвярджаюць, што гэта «старадаўняя традыцыя».

«Абнясенне святыняў вакол гарадоў і вёсак ажыццяўляецца ў перыяды складаных гістарычных падзей, важных грамадскіх узрушэнняў, падчас эпідэмій і нашэсця чужынцаў», — адзначылі ў прэс-службе Пермскай епархіі.

Там дадалі, што «ў гісторыі вядома шмат выпадкаў, калі па малітвах вернікаў, падчас прынясення асабліва шанаваных святыняў, здзяйснення крыжовых хадаў, Гасподзь пасылаў Сваю міласць і дапамогу, вызваляў ад варожага нашэсця, напасцяў і эпідэмій».

8 мая Служба бяспекі Украіны паведаміла, што яе беспілотнікі ў трэці раз паразілі нафтаперапрацоўчы завод Пермнафтоаргсінтэз і нафтаперакачвальную станцыю ў расійскай Пермі.

Папярэднія ўдары па нафтавай інфраструктуры паблізу Пермі беспілотнікі СБУ нанеслі 29 і 30 красавіка.

Паводле дадзеных Reuters, НПЗ у Пермі цалкам спыніў перапрацоўку пасля атакі ўкраінскіх беспілотнікаў 7 мая і да гэтага часу не працуе. Крыніцы агенцтва паведамілі, што пасля удараў беспілотнікаў тэрмінова былі спыненыя тры першасныя ўстаноўкі перагонкі сырой нафты і некаторыя другасныя ўстаноўкі, прычым адзін з блокаў, CDU-4, ужо прастойваў з 30 красавіка — таксама пасля атакі беспілотнікаў.