НАТА можа зраўняць з зямлёй расійскія базы ў Калінінградзе

• 19.05.2026, 8:04

Кіраўнік МЗС Літвы папярэдзіў РФ.

Міністр замежных спраў Літвы Кястуціс Будрыс заявіў, што НАТА мае магчымасці для знішчэння расійскіх баз у Калінінградзе, калі ўзнікне такая неабходнасць.

Пра гэта ён заявіў у інтэрв'ю выданню Neue Zürcher Zeitung.

Паводле яго слоў, Расія ператварыла Калінінград у «маленькую крэпасць» з сістэмамі СПА і ракетнымі комплексамі, аднак Альянс здольны знішчыць гэтыя аб'екты ў выпадку канфлікту.

«Мы павінны паказаць расіянам, што здольныя прарваць іх маленькую крэпасць, якую яны пабудавалі ў Калінінградзе. У разе неабходнасці НАТА мае сродкі, каб зраўняць з зямлёй расійскія базы супрацьпаветранай абароны і ракетныя базы, што знаходзяцца там», — заявіў ён.

Міністр таксама падкрэсліў, што Еўропа не павінна недаацэньваць рызыкі патэнцыйнага канфлікту з Расіяй. Паводле яго слоў, у выпадку прарыву фронту наступствы адчуе не толькі ўсходні фланг НАТА, але і ўвесь ЕС.