У Ваўкавыску пёс здзейсніў «рабаванне стагоддзя»

• 19.05.2026, 13:52

Чацвераногі зладзюжка трапіў на камеры.

Нечыстымі на руку могуць быць не толькі людзі. Пацвярджэннем таму — кадры з Ваўкавыска.

Газета «Гродзенская праўда» назвала тое, што адбываецца на відэа, не інакш як рабаваннем стагоддзя.

У горадзе, чыя гісторыя налічвае больш за тысячу гадоў, на крадзяжы злавілі мясцовага пса.

«Міліцыя выехала на выклік лавіць небяспечнага рэцыдывіста, які скраў мяккую цацку з палаткі. Але камеры здалі зусім іншага байца», — піша выданне.

Бандытам аказаўся мясцовы пёс. Ён незаўважна падкраўся да палаткі з цацкамі і сцягнуў плюшавы трафей.

Потым пёс адбег у бок, радасна віляючы хвастом. Куды ён падзеў украдзенае, не ўдакладняецца.

Чацвераногага зладзюжку вырашылі не караць. Але прадавец надалей будзе ўважлівей сачыць за захаванасцю маёмасці і за нечыстым на лапу мясцовым жыхаром.