Кампанія Ford запускае ў Еўропе сем новых мадэляў аўтамабіляў

• 19.05.2026, 13:41

Сярод навінак — экстрэмальны пікап Ranger Super Duty.

Ford прадставіў маштабны план вяртання ў Еўропу. На сустрэчы з дылерамі ў Зальцбургу кампанія абвясціла пра запуск сямі новых мадэляў, развіццё лічбавых сэрвісаў і абнаўленне ўсёй стратэгіі брэнда на бліжэйшыя тры гады, піша Motor1 (пераклад — сайт Charter97.org).

Асноўная стаўка робіцца адразу на два накірункі. Першы — развіццё Ford Pro, падраздзялення камерцыйнага транспарту, якое ўжо 11 гадоў запар застаецца лідарам на еўрапейскім рынку. Другі — абнаўленне лінейкі легкавых аўтамабіляў з акцэнтам на дызайн і тэхналогіі, натхнёныя ралійнай спадчынай Ford.

Кампанія хоча ператварыцца не проста ў вытворцу аўтамабіляў, а ў лічбавага партнёра для бізнесу. Ford Pro актыўна развівае сэрвісы дыстанцыйнай дыягностыкі і кантролю стану аўтамабіляў. Цяпер да сістэмы падлучаныя больш за 1,2 млн кліентаў у Еўропе, а машыны штодня адпраўляюць амаль 6 млн дыягнастычных сігналаў.

Сярод навінак — экстрэмальны пікап Ranger Super Duty для цяжкіх умоў эксплуатацыі і цалкам электрычны гарадскі фургон Transit City, разлічаны на працу ў зонах з экалагічнымі абмежаваннямі.

Таксама Ford анансаваў пяць новых легкавых мадэляў, уключаючы кампактныя электрычныя кросаверы і новы пазадарожнік сямейства Bronco, арыентаваны на еўрапейскі рынак.

Пры гэтым кампанія заклікала ўлады ЕС змякчыць патрабаванні да пераходу на электрамабілі і падтрымаць гібрыдныя тэхналогіі, заявіўшы, што занадта хуткая адмова ад традыцыйных рухавікоў можа ўдарыць па бізнесе і запаволіць абнаўленне аўтапарку.