Расія перакінула ў Беларусь знішчальнікі МіГ-31К

• 19.05.2026, 13:21

Гэтыя самалёты з'яўляюцца носьбітамі ракет «Кінжал», якімі РФ абстрэльвае Украіну.

У Беларусь перакінутыя два расійскія знішчальнікі МіГ-31К — носьбіты аэрабалістычнай ракеты Х-47М2 «Кінжал». З самалётаў такога тыпу звычайна ажыццяўляюцца пускі падчас паветраных атак па тэрыторыі Украіны.

Аб перадыслакацыі знішчальнікаў з авіябазы «Саваслейка» ў Ніжагародскай вобласці РФ на ваенны аэрадром «Мачулішчы» паблізу Мінска паведамілі ўкраінскія маніторынгавыя Telegram-каналы раніцай 19 мая, адзначыўшы, што самалёты перакінутыя ў межах правядзення сумесных камандна-штабных вучэнняў РФ і РБ.

«У сувязі з наяўнасцю гэтых бартоў у непасрэднай блізкасці да тэрыторыі Украіны магчымыя паветраныя трывогі па ўсёй тэрыторыі пры вылеце гэтых бартоў», — папярэдзіў канал «еРадар».

Раней сайт Сharter97.org пісаў, што Міністэрства абароны Беларусі паведаміла аб пачатку трэніроўкі 18 мая вайсковых часцей баявога прымянення ядзернай зброі і ядзернага забеспячэння. Было заяўлена, што вучэнні праводзяцца ў інтарэсах павышэння гатоўнасці Узброеных Сіл да прымянення сучасных сродкаў паражэння, у тым ліку спецыяльных боепрыпасаў.

Адзначым, вядомы амерыканскі гісторык і публіцыст Юрый Фельштынскі лічыць, што Пуцін можа нанесці ядзерны ўдар па краінах Балтыі або Польшчы з тэрыторыі Беларусі. Падобнай думкі прытрымліваецца і лідар беларускай апазіцыі Мікалай Статкевіч.