Вэнс: У планы ЗША не ўваходзіць атрыманне Расіяй узбагачанага урану Ірана

• 19.05.2026, 22:54

Віцэ-прэзідэнт ЗША абверг інфармацыю, якая з'явілася ў СМІ.

Перадача Расіі іранскага ўзбагачанага урану не ўваходзіць у планы ЗША. Пра гэта заявіў віцэ-прэзідэнт ЗША Джэй Дзі Вэнс, паведамляе Clash Report. Такім чынам ён пракаментаваў інфармацыю СМІ пра тое, што Тэгеран разглядае магчымасць перадачы ўзбагачанага урану Расіі замест ЗША ў рамках мірнай здзелкі.

«Атрыманне Расіяй узбагачанага урану Ірана цяпер не ўваходзіць у нашы планы. Гэта ніколі не ўваходзіла ў нашы планы. Я не ведаю, адкуль узяліся паведамленні пра гэта», — заявіў ён.

Акрамя таго, Вэнс адзначыў, што перамовы ЗША і Ірана знаходзяцца на добрым этапе, але існуе і ваенны варыянт, да якога Вашынгтон не імкнецца.

17 мая іранскае агенцтва Fars паведамляла, што ЗША вылучылі пяць умоў для працягнення перамоў па Іране, і сярод іх ёсць пункт аб вывазе з Ірана 400 кілаграмаў узбагачанага урану.