Кітайскія супертанкеры прайшлі праз Армузскі праліў

• 20.05.2026, 8:45

Сусветныя цэны на нафту імгненна адрэагавалі на пазітыўныя сігналы.

Два кітайскія супертанкеры з 4 млн барэляў іракскай нафты прайшлі праз Армузскі праліў упершыню за доўгі час. Гэта адбылося на фоне аптымістычных заяў Трампа і Вэнса адносна блізкасці здзелкі з Іранам.

Пра гэта паведамляе Reuters.

Што сказалі Трамп і Вэнс

Трамп заявіў, што вайна скончыцца «вельмі хутка», і прызнаў, што ў панядзелак быў «за гадзіну ад рашэння атакаваць», але спыніўся пасля новай іранскай прапановы.

«Іранскія лідары маляць аб здзелцы», — сказаў прэзідэнт, дадаўшы, што новы ўдар адбудзецца праз некалькі дзён, калі дамоўленасці не будзе.

Віцэ-прэзідэнт Вэнс на брыфінгу ў Белым доме заявіў, што Штаты знаходзяцца ў «дастаткова добрай пазіцыі». Ён прызнаў складанасць перамоваў з-за расколу ў іранскім кіраўніцтве.

Танкеры і рынкі

Два кітайскія супертанкеры Yuan Gui Yang і Ocean Lily з 4 млн барэляў іракскай нафты выйшлі праз праліў па іранскім маршруце.

Нафта маркі Brent пасля пазітыўных сігналаў апусцілася да 110,16 долара за барэль.