Сабаленка: Паважаю ўкраінскіх тэнісістак, якія адмаўляюцца ціснуць руку

• 20.05.2026, 11:14

Першая ракетка свету выказалася пра вайну.

Беларуская тэнісістка Арына Сабаленка падзялілася сваім меркаваннем адносна адмовы ад паціскання рук пасля матчаў з боку ўкраінскіх спартсменак:

«Я паважаю адмову ад паціскання рук. Разумею, што гэта не асабістае. Яны такім чынам падаюць сігнал. Але было вельмі цяжка з-за колькасці нянавісці, якую я атрымлівала ад людзей у туры. Адзін трэнер увогуле накінуўся на мяне, быццам гэта я кідаю бомбы.

Відавочна ж, што я хачу міру для ўсіх. Я не хачу, каб гэта адбывалася. Людзі павінны сесці за стол перамоваў і разабрацца з усім гэтым. Але я таксама лічу, што спорт — гэта месца, дзе людзі павінны аб’ядноўвацца, а не ваяваць адзін з адным, быццам у нас уласная вайна. Украінцы і беларусы столькі гадоў былі як браты і сёстры. Мы аднолькавыя. Мы цесна звязаныя адно з адным. А цяпер паміж намі велізарная сцяна, і я не ведаю, ці знікне яна калі-небудзь», — прыводзіць словы Сабаленкі Vogue.

Нагадаем, падчас турніру «Ралан Гарос», які праводзіўся ў 2023 годзе, Сабаленку спыталі пра вайну і ці падтрымлівае яна Лукашэнку.

«Ну, гэта складанае пытанне. Я не падтрымліваю вайну, гэта значыць не падтрымліваю Лукашэнку прама цяпер», — сказала Сабаленка.