Украіна перарэзала лагістыку расіян на акупаваных тэрыторыях

• 20.05.2026, 12:17

Гаворка ідзе пра важныя дарогі ў раёне Данецка, Марыупаля і Старабешава.

Украінскі журналіст Дзяніс Казанскі паведаміў пра масавыя скаргі расіян на сітуацыю з лагістыкай на акупаваных тэрыторыях Украіны. Паводле ягоных слоў, расійскія прапагандысты прызнаюць: перамяшчэнне па найважнейшых трасах стала надзвычай небяспечным з-за актыўнасці ўкраінскіх беспілотнікаў.

У прыватнасці, гаворка ідзе пра важныя дарогі ў раёне Данецка, Марыупаля і Старабешава. Украінскія БПЛА там вядуць пастаяннае назіранне за рухам тэхнікі, выяўляюць ваенныя мэты і перыядычна наносяць удары.

Таксама расіяне з трывогай паведамляюць пра прымяненне дронаў у рэжыме чакання і выкарыстанне «скідванняў». Паводле слоў расійскіх крыніц, сітуацыя на дарогах цяпер больш небяспечная, чым была ў 2023 годзе, бо беспілотнікі дзейнічаюць ужо глыбока ў тыле.

Украінскі бок называе такую тактыку «агнявым кантролем лагістыкі», якая прадугледжвае кругласутачную прысутнасць разведвальных і ўдарных дронаў у паветры над ключавымі дарожнымі артэрыямі.