Таксіст з Бабруйска выратаваў пенсіянерку ад махляроў

• 20.05.2026, 12:55

Ён звярнуў увагу на дзіўныя паводзіны.

У Бабруйску таксіст дапамог прадухіліць махлярства ў дачыненні да 61-гадовай пенсіянеркі, своечасова западазрыўшы падман і звярнуўшыся ў міліцыю, паведамілі ў прэс-службе МУС.

Мужчына вёз пажылую пасажырку ў Мінск і звярнуў увагу на яе трывожны стан, а таксама на тое, што ўвесь шлях яна бязупынна размаўляла па тэлефоне. Падчас паездкі жанчына распавяла, што накіроўваецца ў сталіцу, каб «задэклараваць» свае зберажэнні.

Калі вадзіцель даставіў пасажырку па ўказаным адрасе, ён заўважыў, што гэта зусім не будынак падатковай інспекцыі, а звычайны жылы дом. Гэта выклікала ў яго падазрэнні, пасля чаго ён адразу звязаўся з праваахоўнікамі.

Як высветлілася пазней, пенсіянерцы патэлефанавалі зламыснікі, якія прадставіліся супрацоўнікамі газавай службы. Пад выглядам «праверкі абсталявання» яны пераканалі жанчыну паведаміць код з SMS-паведамлення. Пасля махляры заявілі, што ад яе імя нібыта праводзяцца незаконныя фінансавыя аперацыі, і пераканалі тэрмінова адвезці ўсе наяўныя грошы ў Мінск для так званай «дэкларацыі». Дзякуючы пільнасці таксіста жанчына не паспела перадаць грошы махлярам.