Рэйтынг Трампа знізіўся да мінімуму з-за рэспубліканцаў

• 20.05.2026, 14:21

На ацэнку паўплыяў рэзкі рост цэн на бензін.

Рэйтынг прэзідэнта ЗША Дональда Трампа знізіўся амаль да мінімуму з моманту яго вяртання ў Белы дом — і прычына не ў дэмакратах, а ў яго ўласнай партыі.

Пра гэта паведамляе Reuters.

Згодна з апытаннем, дзейнасць Дональда Трампа на пасадзе прэзідэнта ўхваляюць 35% рэспандэнтаў. Гэта на 1% менш, чым у папярэднім даследаванні на пачатку месяца.

Як піша Reuters, папулярнасць прэзідэнта ў гэтым годзе пацярпела праз рэзкі рост цэн на бензін пасля таго, як Трамп у лютым загадаў нанесці ўдары па Іране разам з Ізраілем.

Вайна істотна парушыла глабальны гандаль нафтай: цэны на паліва для амерыканцаў выраслі прыкладна на 50%.

Гэта выклікала занепакоенасць сярод саюзнікаў Трампа ў Рэспубліканскай партыі напярэдадні прамежкавых выбараў у лістападзе, на якіх будзе вырашацца кантроль над абедзвюма палатамі Кангрэса ЗША.

Падзенне падтрымкі сярод рэспубліканцаў

У партыі Трампа таксама распаўсюджваецца незадаволенасць: 21% рэспубліканцаў заявілі, што цяпер не ўхваляюць дзейнасць прэзідэнта, у параўнанні з 5% адразу пасля яго ўступлення на пасаду ў студзені 2025 года.

Каля 79% рэспубліканцаў у апытанні сказалі, што Трамп добра выконвае сваю працу, у параўнанні з 82% на пачатку месяца і 91% на пачатку яго тэрміну.

Галоўная праблема — цэны

Рэспубліканцаў найбольш не задавальняе тое, як ён вырашае пытанне кошту жыцця. Падчас перадвыбарчай кампаніі 2024 года ён абяцаў знізіць цэны — якраз на фоне інфляцыі, якая пераследавала папярэдняга прэзідэнта Джо Байдэна.

Вынікі апытання:

толькі 47% рэспубліканцаў ухваляюць дзеянні Трампа ў пытаннях цэн

46% рэспубліканцаў кажуць, што ён дрэнна спраўляецца з гэтымі пытаннямі

сярод усіх амерыканцаў толькі кожны пяты задаволены тым, як прэзідэнт кантралюе кошт жыцця.

Апытанне праводзілася з 15 па 18 мая ў анлайн-фармаце. У даследаванні ўзяў удзел 1271 паўналетні жыхар ЗША.