ЕС абвінаваціў рэжымы Расіі і Беларусі ў пагрозе краінам Балтыі

• 20.05.2026, 16:20

Урсула фон дэр Ляен заявіла пра прамую адказнасць Масквы і Мінска за дроны каля ўсходніх межаў ЕС.

Старшыня Еўрапейскай камісіі Урсула фон дэр Ляен заявіла, што Расія і Беларусь «нясуць прамую адказнасць» за беспілотнікі, якія ўсё часцей трапляюць у паветраную прастору краін Балтыі.

Пра гэта яна напісала ў сацыяльнай сетцы X.

Фон дэр Ляен заявіла, што публічныя пагрозы Расіі ў адрас краін Балтыі «абсалютна непрымальныя».

«Няхай у гэтым не будзе аніякіх сумневаў. Пагроза ў адрас адной краіны-члена — гэта пагроза ўсяму нашаму Саюзу», — падкрэсліла яна.

Паводле слоў старшыні Еўрапейскай камісіі, Расія і Беларусь нясуць прамую адказнасць за беспілотнікі, якія «прадстаўляюць пагрозу жыццю і бяспецы людзей на ўсходнім флангу».

«Еўропа адкажа згуртаванасцю і сілай. Мы працягнем узмацняць бяспеку нашага ўсходняга флангу дзякуючы магутнай калектыўнай абароне і гатоўнасці на ўсіх узроўнях», — дадала яна.

Раніцай 20 мая ў некаторых раёнах Літвы абвясцілі паветраную трывогу пасля таго, як у паветранай прасторы паблізу мяжы зафіксавалі з'яўленне дрона.

Вышэйшыя службовыя асобы краіны, уключна з прэзідэнтам, атрымалі распараджэнне спусціцца ў сховішча.

Каля 10:50 паветраную трывогу адменілі. На дадзены момант з афіцыйных паведамленняў няясна, ці заляцеў на тэрыторыю Літвы меркаваны беспілотнік, які стаў прычынай абвяшчэння трывогі.

У памежных з РФ раёнах Латвіі ў гэтыя ж гадзіны таксама абвяшчалі паветраную трывогу — ужо другі дзень запар.