Рауль Кастра — пад прыцэлaм

• 20.05.2026, 17:07

ЗША могуць рыхтаваць афіцыйныя абвінавачанні супраць экс-дыктатара Кубы.

Адміністрацыя прэзідэнта ЗША Дональда Трампа, як чакаецца, абвесціць пра вылучэнне афіцыйных абвінавачанняў супраць былога кіраўніка Кубы Рауля Кастра. Паводле звестак амерыканскіх СМІ, заява можа прагучаць у сераду на памятнай цырымоніі ў Маямі, прысвечанай гадавіне трагедыі 1996 года, калі кубінскія вайскоўцы збілі два амерыканскія самалёты, піша часопіс TIME (пераклад — сайт Charter97.org).

Крыніцы паведамілі, што федэральнае вялікае журы ўжо ўхваліла абвінаваўчае заключэнне супраць 94-гадовага палітыка. Чакаецца ўдзел высокапастаўленых прадстаўнікоў Мінюсту, ФБР і сенатараў ад Фларыды.

Справа звязаная з інцыдэнтам 24 лютага 1996 года. Тады кубінскія ВПС знішчылі два самалёты амерыканскай гуманітарнай арганізацыі, што патрулявала раён паміж Кубай і Фларыдай. Загінулі чацвёра чалавек. У той перыяд Рауль Кастра займаў пасаду міністра абароны Кубы.

Вашынгтон разглядае магчымае абвінавачанне як частку больш шырокай кампаніі ціску на Гавану. Пасля вяртання ў Белы дом Трамп увёў новыя санкцыі супраць Кубы, узмацніў абмежаванні на пастаўкі нафты і нават дапусціў магчымасць «сяброўскага паглынання» краіны.

Прэзідэнт Кубы Мігель Дыас-Канэль ужо абвінаваціў ЗША ў спробе «задушыць кубінскі народ».

Рауль Кастра — адна з ключавых фігур кубінскай палітыкі. Разам з братам Фідэлем ён удзельнічаў у рэвалюцыі 1959 года і кіраваў краінай з 2008 па 2018 гады.