Анджэй Пачобут прыняў прызначэнне ў Палонійную раду пры маршалку Сената Польшчы

• 20.05.2026, 20:41

Былы вязень рэжыму Лукашэнкі заявіў, што для яго гэта вялікі гонар.

Былы вязень рэжыму Лукашэнкі і актывіст польскай меншасці ў Беларусі Анджэй Пачобут прыняў прызначэнне ў Палонійную кансультатыўную раду пры маршалку Сената Польшчы. Малгажата Кідава-Блоньска уключыла яго ў склад рады яшчэ ў 2024 годзе, калі ён знаходзіўся ў зняволенні.

Анджэй Пачобут, выступаючы ў Сенаце, заявіў, што для яго гэта вялікі гонар і што ён адчувае сябе тут, як сярод сяброў.

«Пра гэтае прызначэнне я даведаўся, калі знаходзіўся ў зняволенні. Я быў вельмі ўдзячны і разумеў, што гэта азначае — што Сенат пра мяне не забывае, гэтак жа, як цягам дзесяцігоддзяў ён не забываў пра палякаў у Беларусі і ва ўсім свеце. За ўвесь час свайго існавання Сенат заўсёды з любоўю ставіўся да палякаў за мяжой», — сказаў Анджэй Пачобут.

Анджэй Пачобут таксама падкрэсліў, што Саюз палякаў у Беларусі, нягледзячы на яго забарону, працягвае дзейнічаць.

Нагадаем: 28 красавіка ў выніку абмену зняволенымі Анджэй Пачобут выйшаў на волю пасля пяці гадоў, праведзеных у беларускай турме.