Джэф Безас зрабіў гучную заяву аб ШІ
- 21.05.2026, 11:19
Жыццё стане танней.
Джэф Безас заявіў, што штучны інтэлект прынясе эканоміцы «бязмежную прадукцыйнасць», а людзі змогуць добраахвотна менш працаваць. На яго думку, ШІ зробіць таннейшымі ежу, будаўніцтва жылля і іншыя тавары.
Пра гэта піша New Voice.
Заснавальнік Amazon і Blue Origin даў вялікае інтэрв'ю CNBC, у якім заявіў, што штучны інтэлект зменіць рынак працы, але не абавязкова праз масавае беспрацоўе. Паводле яго слоў, тэхналогія павінна «падняць» работнікаў і рэзка павялічыць прадукцыйнасць эканомікі.
Безас параўнаў развіццё ШІ з з'яўленнем бульдозера для чалавека, які капае яму лапатай. Ён сказаў, што людзі павінны «быць вельмі шчаслівымі» з-за з'яўлення такіх тэхналогій.
На думку мільярдэра, у будучыні многія сям'і, у якіх працуюць двое, змогуць дазволіць сабе, каб адзін з партнёраў увогуле не працаваў. Ён таксама прагназуе дэфляцыю, калі ўлады не пачнуць занадта рана жорстка рэгуляваць штучны інтэлект.
Безас заявіў, што ежа і будаўніцтва жылля могуць патаннець дзякуючы развіццю ШІ. Ён лічыць, што нават калі цяперашні ажыятаж вакол індустрыі акажыцца «бурбалкай», гэта ўсё адно будзе карысна, бо вялікія інвестыцыі пойдуць на развіццё тэхналогій.
Падчас інтэрв'ю ён таксама абараніў буйныя ўкладанні ў сферу штучнага інтэлекту. У прыватнасці, гаворка пра яго стартап Project Prometheus, які займаецца робататэхнікай і ШІ і нядаўна прыцягнуў 10 мільярдаў долараў фінансавання, хаця кампаніі яшчэ няма і шасці месяцаў.
Асобна Безас пракаментаваў дыскусіі пра павышэнне падаткаў для мільярдэраў. Ён сказаў, што нават калі будзе плаціць больш, гэта «не вырашыць праблему» звычайных людзей. Паводле бізнесоўца, падваенне яго падаткаў не дапаможа, напрыклад, настаўніку з нью-йоркскага раёна Квінс.
У матэрыяле таксама ўзгадалі расследаванне ProPublica за 2021 год. Журналісты пісалі, што Безас і іншыя мільярдэры маглі мінімізаваць падаткі, карыстаючыся крэдытамі пад заклад акцый сваіх кампаній. Паводле звестак выдання, эфектыўная падатковая стаўка Безаса тады была менш за 1% ад яго стану.