Расія пачала шукаць нафту ў Паўночнай Карэі
- 22.05.2026, 18:26
Спробы знайсці нафту ў КНДР прадпрымаліся яшчэ за часоў СССР.
Расія пачала марскую разведку нафты і газу на шэльфе КНДР у Японскім моры. Як піша The Moscow Times са спасылкай на NK News, спецыялісты санкт-пецярбургскага ВНИИОкеангеологии адправіліся ў экспедыцыю на навукова-даследчым судне «Павел Гордиенко». У маі–чэрвені 2026 года яны правядуць газагідрагеахімічную здымку марскога дна ў эканамічнай зоне Паўночнай Карэі. Экспедыцыя працягнецца не больш за 33 дні ў перыяд з мая па чэрвень. Апошні сігнал транспондэра карабля быў зафіксаваны ў 33 марскіх мілях на ўсход ад порта Расон. Ля ўзбярэжжа Паўночнай Карэі працуе і іншае расійскае судна — «Ордовик» кампаніі «Севморнефтегеофизика». Гэта даччыная структура «Росгео». Паводле дадзеных MarineTraffic, яно знаходзіцца каля Чхонджына з 29 красавіка.
Разведка пачалася неўзабаве пасля таго, як Масква вырашыла накіраваць на яе амаль $13 млн з бюджэту. У канцы мінулага года першы намеснік міністра фінансаў Ірына Окладнікава заяўляла ў Дзярждуме, што прэзідэнт Уладзімір Пуцін даручыў ацаніць перспектывы нафтагазаноснасці глыбакаводнага басейна Японскага мора на шэльфе КНДР. Пагадненне аб супрацоўніцтве па разведцы вуглевадародаў Масква і Пхеньян заключылі яшчэ ў лістападзе 2023 года. Тады Мінпрыроды заяўляла, што зможа падрыхтаваць дэталёвы план работ пасля атрымання неабходных геафізічных карт.
Спробы знайсці нафту ў Паўночнай Карэі прадпрымаліся яшчэ за часоў СССР, але тады савецкія спецыялісты не выявілі буйных радовішчаў на карэйскім шэльфе. Эксперт па Расіі з універсітэта Донгсо Крыс Мандэй лічыць, што ўдзел Масквы ў асваенні паўночнакарэйскіх рэсурсаў можа стаць «пераломным момантам» для КНДР, калі Расія разглядае магчымасць буйных інвестыцый. Паводле ацэнкі кансультанта па геолагаразведцы Майкла Рэга, усходняе ўзбярэжжа Паўночнай Карэі відавочна ўтрымлівае газ і, магчыма, нафту. «Ёсць паведамленні пра нафтапраявы на шэльфе, але пакуль яны належным чынам не былі пацверджаныя з дапамогай сучасных тэхналогій», — адзначаў ён.