У Швейцарыі адбудзецца рэферэндум аб абмежаванні насельніцтва да 10 млн

• 22.05.2026, 18:48

Галасаванне адбудзецца 14 чэрвеня.

Урад Швейцарыі вынес на рэферэндум ініцыятыву, якая патрабуе абмежаваць колькасць пастаяннага насельніцтва краіны да 10 млн чалавек да 2050 года. Галасаванне па так званай «Ініцыятыве супраць 10 мільёнаў» адбудзецца 14 чэрвеня, паведамляе афіцыйны сайт швейцарскага ўрада.

Ініцыятыва пад назвай «Ніякай Швейцарыі з 10 мільёнамі! (Ініцыятыва ўстойлівага развіцця)» была прапанаваная Швейцарскай народнай партыяй. На канец 2025 года ў Швейцарыі пражывала каля 9,1 млн чалавек. З моманту ўвядзення свабоды перамяшчэння ў 2002 годзе насельніцтва вырасла прыблізна на 1,7 млн, галоўным чынам за кошт імігрантаў.

У выпадку перавышэння парога ў 10 млн чалавек Швейцарыя будзе вымушаная праз два гады скасаваць пагадненне з Еўрасаюзам аб свабодзе перамяшчэння людзей, што таксама прывядзе да анулявання іншых пагадненняў у межах Двухбаковых пагадненняў I. Акрамя таго, пад пытаннем апынецца ўдзел Швейцарыі ў Шэнгенскім і Дублінскім пагадненнях, што паставіць пад пагрозу супрацоўніцтва ў сферы бяспекі і прытулку. Федэральны савет і парламент раней адхілілі гэтую ініцыятыву, палічыўшы яе шкоднай для эканомікі.