Полацкі малочны камбінат банкруціцца

• 22.05.2026, 21:01

Яго актывы плануе набыць буйны холдынг.

Полацкі малочны камбінат апынуўся ў цяжкім фінансавым становішчы і сам падаў заяву аб банкруцтве. Гэтае пытанне разглядалі ў Эканамічным судзе Віцебскай вобласці, піша Office Life.

Паводле судовых дакументаў, агульная запазычанасць прадпрыемства складае больш як 377 мільёнаў рублёў, з якіх каля 71 мільёна — ужо пратэрмінаваныя даўгі. Супраць камбіната адкрыта каля 930 выканаўчых вытворчасцяў на значныя сумы ў розных валютах. Пры гэтым усе актывы прадпрыемства ацэньваюцца прыкладна ў 260 мільёнаў рублёў, і значная іх частка знаходзіцца ў закладзе.

На камбінаце працуе больш за 1300 чалавек, і ён з’яўляецца важным для горада прадпрыемствам. Амаль цалкам (больш як на 99%) ён належыць дзяржаве і выпускае малочную прадукцыю пад рознымі брэндамі.

Раней паведамлялася, што гэта прадпрыемства павінна перайсці пад кіраванне буйнога холдынгу «Савушкін прадукт». Плануецца, што холдынг выкупіць маёмасць камбіната, укладзе каля 70 мільёнаў еўра і створыць на яго базе сучасную вытворчасць.

На першы погляд падача на банкруцтва выглядае нечакана, але, хутчэй за ўсё, гэта тэхнічны крок, звязаны з вялікімі даўгамі і патрабаваннямі заканадаўства. Сам холдынг «Савушкін прадукт» заяўляе, што не адмаўляецца ад сваіх планаў: ён намерваецца набыць маёмасць камбіната праз аўкцыён пасля яе ацэнкі ў межах працэдуры банкруцтва.

Суд ужо пачаў працэс банкруцтва і прызначыў антыкрызіснага кіраўніка. Наступнае пасяджэнне па гэтай справе запланавана на канец ліпеня.