Трамп падоўжыў санкцыі супраць рэжыму Лукашэнкі

• 22.05.2026, 22:29

Яшчэ на год.

Дональд Трамп вырашыў падоўжыць санкцыі ЗША ў дачыненні да кіраўніцтва Беларусі. Яго пастанова была апублікавана ў Федэральным рэестры — зборніку афіцыйных дакументаў урада ЗША.

Упершыню санкцыі былі ўведзеныя Джорджам Бушам-малодшым у 2006 годзе. Тады ў дакумент уключылі тых, хто «падрывае дэмакратычныя працэсы і інстытуты» ў Беларусі.

Абмежаванні неаднаразова падоўжваліся, а 9 жніўня 2021 года Джо Байдэн пашырыў крытэрыі, паводле якіх можна было трапіць у рэестр.

Тэрмін дзеяння санкцый мусіў скончыцца 16 чэрвеня, але Дональд Трамп прыняў рашэнне падоўжыць іх яшчэ на год.

«Дзеянні і палітыка асобных чальцоў урада Беларусі і іншых асоб <...> працягваюць уяўляць сабой незвычайную і надзвычайную пагрозу нацыянальнай бяспецы і знешняй палітыцы Злучаных Штатаў», — гаворыцца ў дакуменце.