Atlantic Council: У Расіі разглядаюць чатыры сцэнары змены ўлады Кадырава

• 23.05.2026, 15:14

З пераемнікамі кіраўніка Чачні ўжо вызначыліся.

Амерыканскі аналітычны цэнтр Atlantic Council выпусціў новы даклад з некалькімі сцэнарамі змены ўлады ў Чачні на фоне пагаршэння здароўя Рамзана Кадырава — цяперашняга кіраўніка рэспублікі.

Аўтары матэрыялу лічаць, што цяперашняя мадэль кіравання рэспублікай, заснаваная на саюзе Кадырава і Пуціна, становіцца ўсё больш нестабільнай.

У дакладзе разглядаюцца чатыры варыянты развіцця падзей: захаванне цяперашняй сістэмы, змена ўлады па рашэнні Масквы, раптоўная смерць Кадырава або ўнутраны пераварот.

Сярод магчымых пераемнікаў называюць прадстаўнікоў блізкага асяроддзя кіраўніка Чачні — Магамеда Даудава, Адама Дзелімаханава і Абузайда Вісмурадава.

Таксама разглядаюцца больш «тэхнакратычныя» фігуры: Адэс Байсултанаў, Муслім Хучыеў і Руслан Эдэльгерыеў.

Аўтары адзначаюць, што спроба перадаць уладу дзецям Кадырава выглядае малаверагоднай з-за адсутнасці ў іх палітычнага досведу і ўплыву сярод сілавікоў.

Сцэнар народнага паўстання ў Чачні ў Atlantic Council лічаць найменш верагодным, хоць цалкам яго не выключаюць.