Цяпер за 150 рублёў той жа набор, але ўжо без мяса

• 24.05.2026, 9:55

Якія тавары сталі не па кішэні беларусам?

Што ў 2026 годзе вы перасталі купляць, бо цана стала захмарнай? Гэты пост у «Трэдсе» сабраў некалькі сотняў каментарыяў беларусаў, піша «Салідарнасць».

«Літаральна летась закупляліся на тыдзень на 100–120 р. У кошыку было і мяса некалькіх відаў, і розныя крупы, і гародніна, і садавіна, і прысмакі. Цяпер за 150 р той жа набор, але ўжо без мяса…» — піша беларуска.

«Вось цікава: калі долар падскочыў угору, усе цэны рэзка прывязалі да долара і таксама паднялі. Цяпер ён ніжэйшы, але чаму ніхто не паспяшаўся зніжаць цэны?» — задаецца пытаннем удзельнік апытання.

У топе тавараў, якія беларусы перасталі купляць: рыба, шакалад, кава і арэхі.

Людзі дзівяцца, чаму мойва — самая танная і даступная рыба — стала каштаваць, як дэлікатэс:

«Перастаў купляць рыбу не столькі таму, што мне дорага, колькі таму, што многім дорага. Яна залежваецца ў крамах і мае такі выгляд, быццам яна «сваёй смерцю памерла».

Вось ад чаго яшчэ давялося адмовіцца беларусам:

«Цукеркі Камунаркі. Нясмачна і каштуюць, як крыло самалёта. Яшчэ і непатрэбны цукар у іх».

«Кіндары. 7–8 рублёў? Вы сур'ёзна? Я іх год таму па 4 купляла дзецям. Дзякуй, але не».

«Пагаворым пра аптэкі? Каб проста купіць пластыр, ты ўжо патраціў рублёў 10… Пра лекі наогул маўчу».

«Пуцёўкі ў нашы санаторыі: хоць жывём 20 гадоў у Дубаі і штогод улетку прылятаем у Мінск, нават для нас цана на пуцёўку ў санаторый аказалася зусім нейкай захмарнай».

«Ялавічны язык, кава, свіныя вушы (раней каштавалі капейкі, а цяпер гэта ўжо лічыцца дэлікатэсам і па кошце — як мяса). Вушы гатавала як закуску да піва — разляцеліся хутчэй за ўсё».

«Чарэшня, 115 рублёў за кілаграм. Адкуль такая цана, яна што, лечыць рак?»

«Немнога не ў тэму, але прышчэпкі ад ВПЧ і энцэфаліту. Я вельмі хацела зрабіць, але на іх насамрэч трэба збіраць грошы».

«Вада хутка будзе даражэйшай за бензін: 1,5–2 рубля за 1–1,5 л. Далей — Кола па 3–4 р за 1 л — не, дзякуй. Снікерсы і падобнае па 4 р (год таму было 1,6–1,8 р) — таксама не. Здаровей буду».

«Жыллё. Вы цэны на кватэры бачылі? Цана ўдвая вышэйшая, чым летась».

«У нас нічога не змянілася, нават больш пачалі купляць, але мы — беларусы ў Польшчы».