Першы танкер з ЗПГ для Індыі прайшоў Армуз

• 24.05.2026, 11:40

У Bloomberg паведамілі пра важную дэталь.

Танкер са звадкаваным прыродным газам для Індыі ўпершыню за некалькі месяцаў выйшаў з Армузскага праліву. Судна праходзіла маршрут з адключанымі сістэмамі адсочвання.

Пра гэта паведамляе Bloomberg.

Паводле дадзеных сістэм адсочвання суднаў, танкер «Аль-Хамра» кампаніі Adnoc Logistics & Services накіроўваецца да заходняга ўзбярэжжа Індыі з грузам ЗПГ на борце.

Судна перастала перадаваць сігнал яшчэ 19 красавіка, калі знаходзілася ля ўваходу ў Армузскі праліў. Пазней, паводле дадзеных Kpler і спадарожнікавых здымкаў, танкер загрузіў газ на экспартным тэрмінале Abu Dhabi National Oil Co. на востраве Дас у Персідскім заліве.

У Bloomberg адзначылі, што падчас загрузкі і праходжання Армуза танкер не перадаваў сваё месцазнаходжанне. Падобную тактыку ў апошнія месяцы выкарыстоўваюць і іншыя суда, звязаныя з Adnoc.

У прыватнасці, кампанія ўжо даставіла аналагічныя грузы ў Японію і Кітай на танкерах, якія таксама выключалі транспондэры падчас праходжання праз небяспечны ўчастак.

Армузскі праліў фактычна застаецца зонай падвышанай рызыкі з-за напружанасці паміж ЗША і Іранам. З-за пагроз бяспецы большасць суднаў праходзяць маршрут з выключанымі сістэмамі адсочвання.

Да вайны праз Армуз штодня праходзіла каля трох танкераў са звадкаваным газам. Аднак за апошнія месяцы пастаўкі з Персідскага заліва ў Індыю амаль спыніліся.

Паводле выдання, летась больш за палову ЗПГ Індыя атрымлівала з Катара і ААЭ. З-за скарачэння паставак краіне давялося актыўней набываць газ на больш дарагім спотавым рынку і абмяжоўваць пастаўкі для асобных галін прамысловасці.

Нягледзячы на паступовае аднаўленне перавозак, цяперашнія аб'ёмы застаюцца значна ніжэй даваеннага ўзроўню.