Арменія можа атрымаць бязвіз з ЕС у найбліжэйшыя два гады

• 24.05.2026, 16:40

Пашынян заявіў пра вырашэнне пытання візавай лібералізацыі.

Арменія разлічвае, што максімум праз два гады ў яе будзе бязвізавы рэжым з Еўрапейскім саюзам. Пра гэта заявіў прэм’ер-міністр краіны Нікол Пашынян падчас сустрэчы з выбаршчыкамі ў межах перадвыбарчай кампаніі, піша News.am.

Паводле слоў Пашыняна, грамадзяне Арменіі ўжо працяглы час скардзяцца, што ўзнікаюць праблемы пры атрыманні віз для наведвання Еўрапейскага саюза.

«А вы ведаеце, чаму ў іх узнікаюць праблемы пры атрыманні віз? Нам кажуць: „Вы ў такіх добрых адносінах з Еўрапейскім саюзам і не можаце вырашыць нейкае пытанне з візамі“. А вы ведаеце, у чым прычына? Бо з 2018 года па 2025 год колькасць грамадзян Арменіі, якія выехалі ў Еўрапейскі саюз, вырасла на 500%. Гэта значыць, пасольствы еўрапейскіх краін не паспяваюць прымаць патокі грамадзян Арменіі. Мы кажам: дарагі народ, найпазней праз два гады ў нас будзе вырашана пытанне лібералізацыі віз паміж Арменіяй і ЕС», — сказаў Пашынян.

Нагадаем, Арменія апошнія гады актыўна збліжаецца з Еўрапейскім саюзам. 4 і 5 мая гэтага года ў Ерэване праходзілі 8-ы саміт Еўрапейскай палітычнай супольнасці і першы ў гісторыі саміт Арменія — ЕС, на які з’ехаліся сусветныя лідары. Там прадстаўнікі

ЕС зноў заявілі пра сваю прыхільнасць да далейшай падтрымкі Ерэвана, адзначыўшы, што «Арменію і ЕС звязваюць агульныя палітычныя каштоўнасці і прыхільнасць міжнароднаму праву, Статуту ААН і заснаванаму на правілах міжнароднаму парадку».