У Магілёве ў гаражах адбыўся выбух

• 24.05.2026, 19:03

Вядома пра трох пацярпелых.

У Магілёве 24 мая адбыўся выбух газапаветранай сумесі ў гаражы на вуліцы Грышына.

Паводле папярэдняй інфармацыі, уладальнік гаража зняў газабалоннае абсталяванне з аўтамабіля і паклаў яго ў аглядную яму. Калі ён карыстаўся зварачным апаратам, успыхнула газапаветраная сумесь.

У выніку гэтага загарэлася адзенне на мужчыне і яго жонцы. Пацярпеў і сусед па гаражы, бо ад успышкі разбурыліся перагародкі ў сумежных памяшканнях. Таксама былі пашкоджаныя два аўтамабілі.

Мужчына і жанчына самі патушылі адзенне. Усіх пацярпелых агледзела брыгада хуткай дапамогі, іх шпіталізавалі.

На месцы здарэння працавалі тры адзінкі тэхнікі МНС. Выратавальнікі ўмацавалі і стабілізавалі будаўнічыя канструкцыі.