Салаўёў прызнаў поўную бездапаможнасць арміі РФ

• 25.05.2026, 9:43

Адэса больш не «рускі горад».

Адзін з вядучых расійскіх прапагандыстаў Уладзімір Салаўёў у эфіры сваёй праграмы нечакана заявіў, што Расіі больш не патрэбная Адэса. Паводле яго слоў, у горадзе нібыта «ўжо не засталося рускіх», а значыць, ён не бачыць сэнсу ў яго «вяртанні», заўважыў украінскі блогер Дзяніс Казанскі.

Гэтым выказваннем расійская федэральная прапаганда фактычна прызнала, што армія РФ не здольная захопліваць буйныя ўкраінскія гарады, уключаючы Адэсу. Замест былой рыторыкі пра «вызваленне» Салаўёў заклікаў адмовіцца ад усякага спачування да жыхароў украінскіх гарадоў.

Паводле яго слоў, Расія не павінна «літаваць» украінцаў, бо разглядае іх як ворагаў.

Падчас эфіру тэлевядучы таксама фактычна прызнаў беспераборны характар расійскіх удараў па тэрыторыі Украіны, заявіўшы, што «у бомбаў няма вачэй».

Акрамя таго, Салаўёў адмовіўся ад аднаго з ключавых тэзісаў расійскай прапаганды пра неабходнасць «абароны рускамоўных». Ён заявіў, што Украіна Расіі нібыта «не патрэбная», а яе грамадзяне з’яўляюцца ворагамі ўжо таму, што падтрымліваюць сваю армію і плацяць падаткі дзяржаве.