У Беларусі зменіцца парадак адпраўкі заказных лістоў

• 25.05.2026, 10:53

«Белпошта» ўводзіць новыя правілы афармлення і аплаты паслугі.

РУП «Белпошта» паведамляе аб змяненні парадку перасылкі паштовых адпраўленняў з паведамленнем аб атрыманні ў межах Беларусі. Як паведамілі ў прэс-службе «Белпошты», з 26 мая 2026 года адпраўнікам больш не спатрэбіцца афармляць папяровы бланк паведамлення.

Новыя правілы афармлення:

— каб адправіць ліст або бандэроль з паведамленнем аб уручэнні, адпраўнік павінен пазначыць на канверце або адрасным ярлыку пазнаку пра від паведамлення — простае ці заказное;

— пасля гэтага астатнія дзеянні выканае паштовая служба.

Аплата паслугі

Паштовыя маркі, у тым ліку электронныя знакі паштовай аплаты («электронная марка»), для аплаты паведамлення больш выкарыстоўвацца не будуць. Замест гэтага прадугледжаны наступныя спосабы разліку:

— фізічныя асобы аплачваюць паведамленне наяўнымі або пры дапамозе картак;

— юрыдычныя асобы і ІП ажыццяўляюць аплату ў безнаяўнай форме, уключаючы выкарыстанне Электроннай авансавой сістэмы.

Дастаўка і змест

Пасля таго як адрасат атрымае паштовае адпраўленне з паведамленнем, супрацоўнікі «Белпошты» раздрукуюць самае паведамленне і даставяць яго адпраўніку.

Раздрукаванае паведамленне аб атрыманні будзе змяшчаць наступную інфармацыю:

— нумар паштовага адпраўлення, дату прыёму, найменне аб’екта паштовай сувязі месца прыёму;

— найменне і паштовы адрас атрымальніка, дату ўручэння, а таксама адбітак каляндарнага штэмпеля з датай дастаўкі паведамлення адпраўніку.