Якое надвор'е чакае беларусаў у чэрвені?
- 26.05.2026, 11:24
Сіноптыкі абяцаюць цёплае лета.
У панядзелак, 1 чэрвеня, пачнецца лета. Якое надвор'е абяцаюць? Ці будзе пасля сапраўднай снежнай і марознай зімы камфортнае лета? Пра гэта піша «Комсомолка».
Нагадаем, што сярэдняя тэмпература паветра зімовага сезону 2025/2026 гадоў склала мінус 5,7 градуса, што на 2,3 градуса ніжэй за кліматычную норму. Часам даводзіцца чуць, што прырода шукае раўнавагу, і калі зіма была халоднай, то лета кампенсуе гэта спёкай. Але сіноптыкі не раз паўтаралі, што прамой сувязі паміж надвор'ем зімой і летам не існуе. У зімы і лета сваё самастойнае жыццё, без абавязкаў. Напрыклад, у 2017-м і зімой тэмпература была ніжэй за норму, і летам. А вось у 2021-м пасля халоднай зімы лета сапраўды аказалася спякотным.
Увогуле, асабліва хвалявацца наконт халоднага лета не варта. З 2010 года толькі два лета ўразілі тэмпературай ніжэй за норму: у 2017 і 2025 гадах. Часцей жа чэрвень–жнівень разам аказваліся вышэй за кліматычную норму і даволі значна.
Дарэчы, тэмпературы чэрвеня 2025-га былі ніжэй за кліматычную норму нязначна — на 0,4 градуса. Але на фоне папярэдніх гадоў здавалася, што на вуліцы вельмі холадна.
Якое надвор'е будзе ў Беларусі ў чэрвені 2026
Сайты, якія з дапамогай аўтаматызаваных сістэм выдаюць доўгатэрміновыя прагнозы, радуюць тым, што з 1 чэрвеня пацяплее. А вось наколькі — інфармацыя супярэчлівая. Паводле адных звестак у Мінску 1–7 чэрвеня будзе каля 19–22 градусаў са знакам плюс, а паводле іншых — ад 21 да 25 цяпла. Да канца месяца дзённая тэмпература паветра ў сталіцы чакаецца ў межах 20–23 градусаў.
На поўдні Беларусі, у Гомелі, 1–7 чэрвеня паветра прагрэецца да 21–24 градусаў. На працягу месяца анамалій не прадбачыцца — тэмпература будзе каля 20–25 цяпла. На поўначы Беларусі, у Віцебску, у першы тыдзень чэрвеня чакаецца каля 22–24 цяпла. У наступныя тыдні ўдзень прагназуецца ў межах 19–23 градусаў са знакам плюс.
Пачатак лета парадуе цеплынёй жыхароў і гасцей Гродна. На захадзе Беларусі 1–7 чэрвеня пацяплее да 21–24. Пазней, у асобныя дні, магчыма зніжэнне тэмпературы да 20 градусаў. Магілёў падтрымае тэндэнцыю да пацяплення ў першы тыдзень лета. На ўсходзе ўдзень у перыяд 1–7 чэрвеня чакаецца ў межах 23–25 цяпла. Без сур'ёзных скачкоў, плюс-мінус пару градусаў, будзе і ў наступныя тыдні.
Першыя дні чэрвеня ў Брэсце пачнуцца з 24–25 цяпла. Паводле некаторых прагнозаў, у першы тыдзень лета паветра можа прагрэцца да 27 градусаў. І ў гэтым рэгіёне Беларусі спёкі пакуль не чакаюць. Слупок тэрмометра на працягу месяца будзе паказваць у межах 21–25 са знакам плюс.
Але гэта ўсё разлікі аўтаматызаваных сістэм. А яны пралічваюць надвор'е недакладна. Як тут не згадаць словы сіноптыкаў пра тое, што дакладны прагноз даецца на тры дні, а далей апраўданасць хутка падае. Напрыклад, на 10 сутак апраўданасць — усяго 50%. А ўжо прагноз на месяц, лічы, — латарэя.