У Беларусі «знікаюць» працаўнікі

• 26.05.2026, 11:47

Мінус 8,8 тысячы чалавек за месяц.

Колькасць занятых у эканоміцы Беларусі за месяц скарацілася на 8,8 тысячы чалавек. Пра гэта сведчаць дадзеныя Белстата.

У красавіку ў эканоміцы краіны былі занятыя 4 млн 172,1 тыс. чалавек — гэта менш, чым у мінулым месяцы. Аднак у параўнанні з красавіком мінулага года колькасць працаўнікаў, наадварот, павялічылася на 36,3 тыс.

Пры гэтым на 26 мая ў Беларусі захоўваецца высокі попыт на кадры: у агульнарэспубліканскім банку вакансій размешчана амаль 137,2 тыс. прапаноў ад наймальнікаў.

Заўважым, дапамога па беспрацоўі ў Беларусі складае 40 беларускіх рублёў у месяц, або $20. Такі памер устаноўлены пастановай Саўміна №1064.

Мала таго, у Беларусі працаздольных грамадзян, якія не працуюць больш за 183 дні ў годзе, лічаць «дармаедамі». Яны плацяць за жыллёва-камунальныя паслугі па поўных тарыфах, а за ўхіленне прадугледжаныя штрафы.