Амерыканская баскетбалістка пакінула мінскі клуб пасля скандалу на мяжы

• 26.05.2026, 13:15

Цяпер яна ў вышуку.

Амерыканская баскетбалістка Доніка Косбі, якая выступала за мінскі клуб «Гарызонт», разарвала з ім кантракт пасля дагляду на мяжы і вобшуку. Цяпер яна ў вышуку, піша «Медыязона».

Прозвішча Донікі выданне выявіла ў расійскай базе вышуку, аднак у картцы не пазначана, у якой краіне ў дачыненні да яе ўзбудзілі крымінальную справу — у Расіі ці Беларусі, і па якім артыкуле.

Абставіны справы для самой спартсменкі таксама невядомыя. У 2025 годзе яна спыніла ігравую кар’еру і цяпер працуе памочніцай галоўнага трэнера жаночай баскетбольнай каманды ў кам'юніці-каледжы Місісіпі Галф-Кост.

Паводле слоў Косбі, у 2024 годзе яна вярталася ў Беларусь пасля адпачынку на Каляды, і на мяжы ў яе канфіскавалі заплечнік «для нейкіх тэстаў або штосьці накшталт таго». Спартсменку тады ўсё ж пусцілі ў Беларусь, але праз тры тыдні запрасілі на апытанне, пасля якога яна пакінула краіну.

«Да мяне ставіліся як да злачынніцы, або штосьці ў гэтым родзе, калі я перасякала мяжу. Шукалі хоць якую прычыну, каб мяне арыштаваць, таму я не здзіўленая», — распавяла баскетбалістка.