ЗША і ЕС высмеялі заявы Лаўрова
- 26.05.2026, 13:16
Замежных дыпламатаў з Кіева эвакуяваць не будуць.
Саюзнікі Украіны праігнаравалі чарговыя пагрозы Крамля. Вайна ва Украіне проста павінна скончыцца, — заявіў дзяржаўны сакратар ЗША Марка Рубіа пасля званка міністра замежных спраў РФ Сяргея Лаўрова, у якім той рэкамендаваў эвакуяваць дыпламатычны персанал і іншых грамадзян ЗША з Кіева. «Яны разаслалі паведамленне ўсім пасольствам, і, думаю, ён проста патэлефанаваў мне асабіста, каб сказаць — яны паведамілі ўсім пасольствам, — што Кіеў стане вельмі небяспечным месцам», — расказаў Рубіа. Аднак, дадаў дзяржаўны сакратар, «Кіеў ужо не першы год з’яўляецца вельмі небяспечным месцам».
Аналагічна выказалася пасол Еўрасаюза ва Украіне Катарына Матэрнова: «Расія зноў пагражае дыпламатам і іншаземцам, заклікаючы нас пакінуць Кіеў. Але мы нікуды не сыдзем!» Яна назвала такія пагрозы прыкметай не сілы, а роспачы. «Чым больш агрэсіўна і пагрозліва паводзіць сябе Крэмль, тым больш відавочна, што рэжым Пуціна разумее: яму не зламаць устойлівасць Украіны і падтрымку яе партнёраў. Кіеў вытрымае. Украіна вытрымае. І мы таксама», — напісала Матэрнова.
Пагрозы Лаўрова і расійскага МЗС, што Узброеныя сілы РФ «прыступаюць да сістэмных і паслядоўных удараў» па Кіеве ў адпаведнасці з загадам Уладзіміра Пуціна, яна назвала «шэдэўрам крывадушнасці». «Рэжым, які гадамі бамбіў жылыя дамы, музеі, радзільні, школы і электрастанцыі, цяпер раптам загаварыў мовай «міжнароднага гуманітарнага права» і «Жэнеўскіх канвенцый». Той жа рэжым, які кожную ноч наносіць удары ракетамі і дронамі па мірных жыхарах, цяпер папярэджвае іншых, каб тыя трымаліся падалей, — заявіла Матэрнова. — Мы дакладна разумеем, што гэта значыць. Расія хоча страху. Панікі. Ізаляцыі Украіны. Гэта не спрацуе».
Гэты тэрор супраць мірных жыхароў і дыпламатычных прадстаўніцтваў у Кіеве пасольства Польшчы ва Украіне назвала імкненнем дасягнуць палітычных мэтаў, якіх Крэмль не можа дасягнуць ваенным шляхам. Пагрозы МЗС РФ «сведчаць пра імклівае набліжэнне да тупіку, у якім апынулася расійская захопніцкая вайна», заявіла пасольства Францыі ва Украіне.
Рубіа дадаў: «Кожны раз, калі мы бачым такія маштабныя ўдары з таго ці іншага боку, гэта нагадвае нам, чаму гэтая жудасная вайна, якая цягнецца ўжо даўжэй, чым Другая сусветная, мусіць нарэшце скончыцца».
Апошнімі днямі Расія ўдзень і ўначы праводзіць масіраваныя бамбардзіроўкі Кіева і іншых рэгіёнаў Украіны з ужываннем сотняў беспілотнікаў і дзясяткаў ракет. Падчас удару ў ноч на 24 мая была выкарыстана гіпергукавая ракета «Арэшнік».