Арына Сабаленка распавяла, як пройдзе яе вяселле ў Грэцыі

• 26.05.2026, 14:51

Тэнісістка захавае сваё дзявочае прозвішча.

Першы нумар сусветнага рэйтынгу, беларуска Арына Сабаленка распавяла на YouTube-канале First & Red, што яна ні ў якім разе не надзене на сваё вяселле, каго з гасцей запросіць і чаму захавае сваё дзявочае прозвішча.

Зараз Арына знаходзіцца ў Парыжы, дзе 26 мая правядзе свой першы матч на «Ралан Гарос» супраць іспанкі Джэсікі Бусас Манэйра.

Арына Сабаленка, пасля адказу «так» на прапанову бразільскага бізнесмена грэчаскага паходжання Георгіёса Франгуліса, з сакавіка 2026 года знаходзіцца ў статусе шчаслівай нявесты. Вяселле, як яна казала ў адным з інтэрв’ю, плануецца на лета 2027 года ў Грэцыі. Пакуль жа яна адказала, якім уяўляе сабе гэта свята. Галоўнае — побач будзе чалавек, якога яна любіць і паважае.

— У яго ёсць рысы, што нагадваюць мне пра майго бацьку, — разважала Арына пасля напаміну пра тое, што яе бацька і жаніх па знаку задыяка — Дзевы.

Пасля шлюбу Арына Сабаленка захавае сваё дзявочае прозвішча. Яна тлумачыць гэта так:

— У мяне свая гісторыя, і, слава богу, у гэтым ёсць разуменне. Мне хочацца прозвішча майго бацькі ў гісторыю ўпісаць. Але калі ў нас будуць дзеці, то там будзе барацьба… І я ўжо прайграю ў гэтай бітве. Дык што дзеці ў нас будуць Франгулісы.

У бліц-апытанні Арыну папрасілі адказваць толькі двума словамі — «норм ці стрэм» — на некалькі пытанняў пра вяселле. Так мы даведаліся, што яна цалкам можа згуляць турнір напярэдадні вяселля. Ну а як інакш, калі летам вельмі шчыльны расклад?!

Красоўкі пад вясельную сукенку яна не надзене, таму што гэта «стрэм». А вось тэнісную фотасесію ў вясельнай сукенцы правесці не супраць:

— Але толькі, калі гэта будзе не адзіная фотасесія. Усё ж такі хочацца больш нейкай пяшчоты, ці што.

Далей ёй давялося выбраць адказ на пытанне, ці можа на ўрачыстасці быць вясельны торт у выглядзе тэніснага мяча? Арыне такая ідэя не падабаецца.

— Тыгр — норм, — прапанавала Сабаленка, нагадаўшы пра свой сімвал.

Размаўляць на вяселлі пра тэніс Арына не хацела б. А вось гасцей са свету тэніса яна, вядома, запросіць:

— Ну, не ўсіх, натуральна, але самых клявых — норм.

Сярод іх будзе яе сяброўка іспанка Паўла Бадоса і расіянін Карэн Хачанаў.

— Карэнчык абавязкова, Насця Патапава, Калінская Аня — абавязкова. Юльчык таксама прыйдзе, я не ведаю, Вольга Гаварцова — гэта ўжо з тых, хто скончыў...