У ноч на 26 мая на тэрыторыю Украіны заляталі беспілотнікі з Беларусі

• 26.05.2026, 19:40

Што пра гэта вядома.

У ноч на 26 мая на тэрыторыю Украіны з Беларусі заляталі беспілотнікі, паведамляе гомельскі тэлеграм-канал «Флагшток» са спасылкай на ўкраінскія маніторынгавыя рэсурсы.

Беспілотнікі пераважна былі зафіксаваныя ў Брэсцкай вобласці.

Паведамляецца, што «каля 02:50 БПЛА прыляцеў з Беларусі курсам на Дубровіцу ў Роўненскай вобласці, а ў 03:20 адзін з расійскіх дронаў вылецеў з тэрыторыі Роўненшчыны ў напрамку Століна».

Раніцай, а 07:10, адразу тры беспілотнікі рухаліся ўздоўж беларуска-ўкраінскай мяжы з Жытоміршчыны на Роўненшчыну.

А 23:30 25 мая паблізу горада Васілевічы ў Рэчыцкім раёне працаваў борт тактычнай авіяцыі, меркавана, Су-30, сцвярджаюць рэсурсы.

Да гэтага каля 10:00 «адбыўся залёт БПЛА на Чарнігаўшчыну з Гомельшчыны — дрон накіроўваўся ў бок Славуціча».

Такім чынам, як мінімум тры выпадкі залётаў расійскіх беспілотнікаў у Беларусь былі зафіксаваныя за мінулыя суткі.

25 мая паведамлялася, што каля вёскі Янава Сенненскага раёна (Віцебская вобласць) 23 мая ўпаў БПЛА, ён пашкодзіў лінію электраперадачы.