На Далёкім Усходзе анансавалі масавыя адключэнні электраэнергіі

• 27.05.2026, 4:20

З-за «крытычных» даўгоў насельніцтва па ЖКГ.

У Прыморскім краі ўводзяцца масавыя абмежаванні падачы электраэнергіі і гарачай вады ў сувязі з высокім узроўнем запазычанасці насельніцтва за камунальныя паслугі, піша The Moscow Times.

«Прычынай стала крытычнае павелічэнне запазычанасці насельніцтва за энергарэсурсы — сума доўгу перавысіла 5,8 млрд расійскіх рублёў», — патлумачылі ў прэс-службе ПАО «ДЭК».

У найбліжэйшыя дні мабільныя брыгады ў складзе прадстаўнікоў Дальэнергасбыту, кіравальных кампаній і сеткавых арганізацый пачнуць адключаць неплацельшчыкаў. Ужо разаслана каля 13 тысяч паведамленняў: калі доўг не пагасцяць на працягу 20 дзён, адключэнне адбудзецца аўтаматычна — без паўторнага папярэджання. Для аднаўлення падачы рэсурсаў неабходна цалкам пагасіць доўг і аплаціць пеню. Самавольнае падключэнне да сетак пагражае адміністрацыйнай адказнасцю, папярэджваюць энергетыкі.

Сітуацыя разгортваецца на фоне імклівага росту тарыфаў ЖКГ у Расіі. Урад заклаў у федэральны бюджэт павышэнне камунальных плацяжоў у сярэднім на 9,9% у 2026 годзе, на 8,7% у 2027-м і на 7,1% у 2028-м — усяго за тры гады на 27,9%. Пры гэтым, паводле даных Расстата, у 2025 годзе рост коштаў на паслугі ЖКГ стаў рэкордным за 15 гадоў (13,3% у гадавым выражэнні). З пачатку 2026 года жыхары многіх рэгіёнаў скардзіліся на рэзка павялічаныя сумы ў квітанцыях; прэм'ер-міністр Міхаіл Мішусцін усклаў віну за гэта на мясцовыя ўлады.

У лістападзе кіраўнік Мінбуда Ірэк Файзулін ацэньваў прострочаную запазычанасць расіян за «камуналку» ў 415 млрд расійскіх рублёў, настойваючы на вяртанні гэтых сродкаў у эканоміку для мадэрнізацыі сетак, знос якіх у шэрагу рэгіёнаў дасягае 80%. У лютым улады анансавалі паскарэнне працэдуры спагнання даўгоў за ЖКГ анлайн — праз платформу ГИС ЖКХ з 2028 года.