Нябензя абурыўся рашэннем ЗША не выдаць візу намесніку Лаўрова

• 27.05.2026, 13:47

Пастаянны прадстаўнік Расіі пры ААН нервова адрэагаваў на сітуацыю.

Пастаянны прадстаўнік Расіі пры ААН Васіль Нябензя раскрытыкаваў адмову Вашынгтона выдаць візу намесніку кіраўніка МЗС РФ Аляксандру Алімаву, які павінен быў узяць удзел у пасяджэнні Савета Бяспекі ААН.

Пра гэта паведамляе расійскае агенцтва «Інтэрфакс».

Нябензя ўбачыў у такім рашэнні ЗША «няпавагу да Кітая».

«Нягледзячы на ўсе нашы спробы дамагчыся ад амерыканскага боку выдачы яму візы, яна так і не была выдадзена. Разглядаем гэта не толькі як парушэнне Вашынгтонам сваіх абавязацельстваў па Пагадненні аб цэнтральных установах ААН (...), але і як крыклівую няпавагу да старшынства Кітая ў Савеце Бяспекі і да тэмы, якую мы сёння абмяркоўваем, – Статута ААН», – заявіў ён падчас пасяджэння.

Нябензя нагадаў, што Алімаў, які курыруе праблематыку ААН, павінен быў наведаць пасяджэнне ў аўторак па запрашэнні кіраўніка МЗС КНР Вана І. У маі Кітай старшынствуе ў Савеце Бяспекі ААН.