У Гродне абмяркоўваюць дзіўны аўтамабіль на вуліцах горада

• 27.05.2026, 20:36

Відэафакт.

У Гродне ўжо некалькі дзён абмяркоўваюць незвычайны аўтамабіль, які рэгулярна з’яўляецца на вуліцах горада. Невялікі хэтчбэк цяжка не заўважыць: салон аўтамабіля амаль цалкам заставлены мяккімі цацкамі, а вялікая плюшавая карова прымацаваная на даху, піша партал Newgrodno.by.

За рулём, паводле слоў відавочцаў, знаходзіцца мужчына. З машыны нярэдка гучыць гучная музыка, а незвычайнае афармленне аўто хутка прыцягнула ўвагу гараджан.

Аднак пазней відавочцы заўважылі, што кіроўца перавозіць у адкрытым багажніку сабак.

«Мы сустрэлі яго на Юбілейным возеры. Пад’ехала машына з сабакамі ў багажніку. Выглядала ўсё гэта не вельмі прыгожа. Але на пытанні, што адбываецца, кіроўца адказваў груба, маўляў, ён ратуе жывёл», — распавяла чытачка.

На апублікаваных у сацсетках відэа жывёл перавозяць у адкрытым багажніку. У пэўны момант адна з сабак вывалілася з багажніка падчас руху, і яе пацягнула за аўтамабілем, бо псы прывязаныя да яго.

Здаецца, адказ на пытанне, ці можна так перавозіць жывёл, відавочны.