Зяленскі патлумачыў, чаму звярнуўся да ліставання з Трампам

• 27.05.2026, 23:46

Што Кіеў і Вашынгтон разам павінны выправіць?

Прэзідэнт Украіны Уладзімір Зяленскі пацвердзіў ліст, накіраваны амерыканскаму калегу Дональду Трампу. Ён падкрэсліў, што цяпер сітуацыя такая, што «трэба дзейнічаць аператыўна».

Пра гэта паведамляе Charter97.org са спасылкай на заяву Зяленскага ў Telegram.

«Гэта бывае рэдка, калі лідары іншай краіны звяртаюцца так, лістом, адначасова да прэзідэнта і Кангрэса Злучаных Штатаў Амерыкі, але сітуацыя цяпер такая: трэба дзейнічаць аператыўна, дзейнічаць вынікова», — паведаміў кіраўнік дзяржавы.

Прэзідэнт падкрэсліў важнасць таго, каб «Амерыка пачула Украіну». У той жа час ён адзначыў, што шмат глабальнай увагі цяпер надаецца вайне ў Іране.

«Трэба спыняць і вайну тут, у Еўропе, — вайну вельмі крывавую, якая доўжыцца ўжо пяты год у поўнамаштабным фармаце. І чым хутчэй мы зможам забяспечыць больш абароны ад балістычных ракет, тым хутчэй зможам зрабіць так, каб дыпламатыя спрацавала», — заявіў Зяленскі.

Ён падкрэсліў, што пакуль Расія разлічвае на ракеты, «яе цікавасць да дыпламатыі несапраўдная».

«Мы павінны гэта выправіць. І можам гэта выправіць толькі разам з Амерыкай. Украіна ўдзячная Амерыцы за ўсю падтрымку. Яшчэ больш будзе ўдзячная за годны мір і гарантаваную бяспеку. Усё гэта магчыма, калі хопіць рашучасці», — падкрэсліў прэзідэнт Украіны.