Украінскія дроны ператварылі «сухапутны мост» Расіі ў смяротную пастку

• 28.05.2026, 13:04

Расійская лагістыка на поўдні Украіны не вытрымлівае націску абаронцаў.

У акупаваных раёнах Украіны ўзмацняецца беспілотная кампанія, якая наносіць сур'ёзныя ўдары па забеспячэнні расійскіх войск. Пра гэта паведамляе шэраг аналітыкаў і крыніц, апісваючы тое, што адбываецца, як «лагістычную блакаду», піша CEPA (пераклад — сайт Charter97.org).

Паводле дадзеных назіральнікаў, ударныя беспілотнікі сістэматычна паражаюць грузавікі і палівазапраўшчыкі на маршрутах паміж Расіяй і Крымам. Толькі за май былі знішчаныя дзясяткі машын далёка ад лініі фронту, а агульная колькасць паражаных мэт ужо перавышае сотню.

Аналітыкі адзначаюць, што амаль уся ваенная лагістыка Расіі на паўднёвым напрамку залежыць ад наземных маршрутаў. Збоі на аўтадарогах і чыгунцы прыводзяць да неадкладных страт і ўскладняюць забеспячэнне фронту.

Украіна, паводле ацэнак экспертаў, атрымала тэхналагічную перавагу ў сферы беспілотнікаў. Новыя сістэмы з далёкасцю больш за 100 кіламетраў і палепшанай навігацыяй дазваляюць паражаць мэты ў глыбокім тыле. Масава ўжываюцца і больш танныя FPV-дроны, якія пашырылі радыус удараў.

Вайсковыя крыніцы Украіны заяўляюць, што мэта кампаніі — не поўнае спыненне забеспячэння, а яго сістэмнае паслабленне, каб знізіць баяздольнасць расійскіх падраздзяленняў на перадавой.

Расійскія ваенныя блогеры таксама прызнаюць рост пагрозы, адзначаючы, што рух па дарогах у зоне акупацыі становіцца надзвычай небяспечным.

На думку аналітыкаў, Украіна спрабуе стварыць эфект «баёвай ізаляцыі» расійскіх войскаў, выкарыстоўваючы беспілотнікі замест авіяцыі. Пры захаванні тэмпаў вытворчасці і пашырэнні ўжывання дронаў ціск на лагістыку можа ўзмацніцца ў бліжэйшыя месяцы.