Беспілотнікі атакавалі тры звязаныя з Расіяй танкеры ля берагоў Турцыі

• 28.05.2026, 14:25

Яны знаходзяцца пад санкцыямі.

У Чорным моры каля паўночнага ўзбярэжжа Турцыі ў чацвер былі атакаваныя тры танкеры, якія раней перавозілі расійскую нафту і нафтапрадукты.

Пра гэта Reuters паведаміла са спасылкай на судаходнае агенцтва Tribeca. Танкер James II пад сцягам Палау ішоў без грузу і быў атакаваны прыкладна за 80 км на поўнач ад раёна Тюркелі. Яшчэ два танкеры — Altura і Velora пад сцягам Сьера-Леонэ — былі атакаваныя падчас перавалкі паміж суднамі. Турцыя накіравала да месца здарэння катэры берагавой аховы.

Паводле дадзеных Tribeca, ніхто з членаў экіпажаў не пацярпеў. Украіна і Расія напад не каментавалі. Мінтранс Турцыі таксама не даў каментароў.

Усе тры судны раней перавозілі расійскую нафту і трапілі пад санкцыі. Altura і Velora перавозілі нафту «Раснафты» і знаходзяцца пад санкцыямі ЕС з 24 кастрычніка 2025 года. Пазней санкцыі супраць судоў таксама ўвялі Швейцарыя, Вялікабрытанія і Канада. З 19 лістапада 2025 года імі кіруе турэцкая кампанія Pergamon Denizcilik Isletmeleri. Altura і Velora звязваюць з сеткай кампаній, звязаных з Эктарам Варэлай дэ Леонам і Махамадам Хасэйнам Шамхані — сынам дарадцы вярхоўнага кіраўніка Ірана. Танкер James II выкарыстоўваўся для экспарту нафты і нафтапрадуктаў з расійскіх портаў з чэрвеня 2024 года. 20 мая 2025 года Вялікабрытанія ўвяла супраць яго санкцыі.