«Пуцін паспрабуе завербаваць любога еўрапейскага перамоўцу»

• 28.05.2026, 17:00

Экс-прэм'ер Украіны не верыць у праўдзівасць намераў Крамля завяршыць вайну.

Былы прэм'ер-міністр Украіны Арсеній Яцэнюк папярэдзіў еўрапейскіх лідараў пра рызыкі прамых перамоваў з Крамлём, заявіўшы, што Пуцін паспрабуе выкарыстаць любога патэнцыйнага пасярэдніка ў інтарэсах Расіі, піша Euronews (пераклад — сайт Charter97.org).

У інтэрв'ю Яцэнюк заявіў, што расійскі прэзідэнт «не ідыёт, а былы супрацоўнік КДБ», які ацэньвае суразмоўцаў з пазіцыі сілы і слабасці.

Паводле яго слоў, Пуцін здольны «абраць чалавека, якога зможа завербаваць», а самі перамовы Масква можа выкарыстоўваць выключна для зацягвання часу і ціску на Захад.

Яцэнюк падкрэсліў, што праблема палягае не ў кандыдатуры магчымога еўрапейскага пасланца, а ў агульнай стратэгіі Еўропы. На яго думку, Крэмль «разумея толькі мову сілы».

Былы прэм'ер таксама заявіў, што Расія ўзмацняе ціск не толькі на Украіну, але і на краіны ЕС, уключаючы Балтыю. Ён звязаў нядаўнія інцыдэнты з беспілотнікамі ў рэгіёне са спробамі запалохаць еўрапейскае грамадства і аслабіць падтрымку Кіева.

Асобна Яцэнюк выказаўся пра ролю Кітая, назваўшы Пекін «саўдзельнікам» вайны з-за цеснага супрацоўніцтва з Масквой. Паводле яго слоў, Кітай працягвае падтрымліваць Расію фінансава і пастаўкамі прадукцыі падвойнага прызначэння.

Ён таксама скептычна ацаніў папярэднія дыпламатычныя кантакты Масквы і Вашынгтона, заявіўшы, што Крэмль выкарыстоўвае перамовы як інструмент палітычнай гульні і спробу раскалоць саюзнікаў Украіны.

Пры гэтым Яцэнюк лічыць, што, нягледзячы на эскалацыю, Расія нясе сур'ёзныя страты і эканамічныя выдаткі. На яго думку, далейшае ўзмацненне пагроз з боку Крамля звязана з жаданнем Пуціна захаваць уласную ўладу і палітычнае выжыванне.