Венгры перажываюць нешта экстраардынарнае

• 28.05.2026, 17:19

Сапраўдныя змены пад новым кіраўніцтвам.

Венгрыя перажывае найбольшыя палітычныя змены за апошнія 16 гадоў пасля паразы былога прэм’ер-міністра Віктара Орбана на красавіцкіх выбарах. Новы прэм’ер-міністр Петэр Мадзяр усяго за некалькі тыдняў пачаў маштабную перабудову дзяржавы і дэмантаж сістэмы, створанай былым лідарам, піша CEPA (пераклад — сайт Charter97.org).

Мадзяр афіцыйна ўступіў на пасаду 9 мая — у Дзень Еўропы. Яго партыя Tisza атрымала канстытуцыйную большасць у парламенце, што дазволіла новаму ўраду хутка прыступіць да рэформаў.

Паводле дадзеных мясцовых СМІ, адразу пасля выбараў атачэнне Орбана спрабавала знішчаць дакументы, тэрмінова заключаць здзелкі і выводзіць актывы за мяжу. Менавіта таму новая ўлада спяшалася як мага хутчэй узяць кіраванне краінай пад кантроль.

Адзін з першых сімвалічных крокаў — вяртанне сцяга Еўрасаюза над парламентам. Таксама для публікі адкрылі былую рэзідэнцыю Орбана — шыкоўны комплекс з дарагімі інтэр’ерамі і пакоямі для цыгар, які стаў сімвалам празмерных выдаткаў папярэдняй улады.

Новая адміністрацыя ўжо рыхтуе папраўкі да Канстытуцыі, якія абмяжуюць тэрмін знаходжання прэм’ер-міністра пры ўладзе васьмю гадамі. Гэта фактычна закрывае Орбану шлях да вяртання на пасаду кіраўніка ўрада.

Сам Орбан пасля паразы рэзка сышоў у цень. Ён адмовіўся ад парламенцкага мандата і не з’явіўся на першым пасяджэнні новага парламента.

Мадзяр робіць стаўку на публічнасць і хуткасць рэформ. У яго кабінет увайшлі не партыйныя ветэраны, а вайскоўцы, дыпламаты і незалежныя спецыялісты. Адначасова ўлады пачалі праверку гучных карупцыйных спраў і выдаткаў былога ўрада.

На фоне гэтых змен папулярнасць партыі Tisza працягвае расці, а пазіцыі Fidesz імкліва слабнуць.