Цэны на нафту зніжаюцца

• 28.05.2026, 18:01

Каціроўкі рэагуюць на навіны пра пагадненне ЗША і Ірана.

Кошт жнівеньскіх ф’ючэрсаў на нафту Brent на лонданскай біржы ICE Futures на таргах у чацвер, 28 мая, на мінімуме знізіўся на 1,6%, да $90,79 за барэль. Пра гэта сведчаць даныя таргоў станам на 17:13 па Мінску. Ніжэй за $91 за барэль нафта не гандлявалася з 17 красавіка.

Каціроўкі паскорылі зніжэнне на фоне навін пра пагадненне ЗША і Ірана аб спыненні агню. Выданне Axios паведаміла, што перамоўшчыкі дзвюх краін дасягнулі пагаднення аб 60-дзённым мемарандуме аб спыненні агню і запуску перамоваў па ядзернай праграме, аднак амерыканскі прэзідэнт Дональд Трамп пакуль канчаткова яго не ўхваліў.

Паводле слоў амерыканскіх чыноўнікаў, мемарандум прадугледжвае «неабмежаваны» праход праз Армузскі праліў — без пошлін і затрыманняў суднаў іранскімі сіламі. Таксама Тэгеран павінен будзе прыбраць усе міны з праліву на працягу 30 дзён.