Украіна атрымае яшчэ амаль 3 млрд еўра ад ЕС

• 28.05.2026, 19:24

Пра гэта паведаміла прэм'ер-міністр Украіны.

Рада Еўрапейскага саюза прыняла рашэнне пра выдзяленне Украіне фінансавай дапамогі ў памеры амаль 2,8 млрд еўра.

Пра гэта паведамляе РБК-Украіна са спасылкай на заяву прэм'ер-міністра Украіны Юліі Свірыдэнкі.

Выдзяленне чарговага траншу стала магчымым пасля таго, як Еўрапейская камісія станоўча ацаніла выкананне ўмоваў Плану Украіны за чацвёрты квартал 2025 года. Сродкі прадастаўляюцца ў межах маштабнай чатырохгадовай праграмы падтрымкі Ukraine Facility.

Свірыдэнка выказала падзяку народным дэпутатам за аператыўнае прыняцце неабходных законаў.

Па стане на канец мая 2026 года сумеснымі намаганнямі ўрада і парламента ўжо выканана 86 крокаў Плану Украіны, а яшчэ 65 знаходзяцца на стадыі рэалізацыі.

«Працягваем разам укараняць рэформы і рухацца шляхам еўрапейскай інтэграцыі. Шчыра ўдзячныя еўрапейскім партнёрам за падтрымку і давер», — падкрэсліла кіраўніца ўрада.

Праграма Ukraine Facility з'яўляецца ключавым інструментам фінансавай падтрымкі Украіны ў умовах вайны. Агульны бюджэт ініцыятывы на 2024–2027 гады складае 50 млрд еўра.

З улікам новага траншу з пачатку працы гэтага інструмента ў 2024 годзе Украіна ўжо атрымала 26,8 млрд еўра еўрапейскай дапамогі.