Ракета мільярдэра Джэфа Безаса ўзарвалася проста падчас выпрабаванняў у ЗША

• 29.05.2026, 7:45

У выніку надзвычайнага здарэння ніхто не пацярпеў.

Ракета Blue Origin New Glenn узарвалася ў чацвер увечары на стартовай пляцоўцы на мысе Канаверал у Фларыдзе. У кампаніі-вытворцы ракеты паведамілі, што ў выніку надзвычайнага здарэння ніхто не пацярпеў.

Пра гэта паведамляе CBS News.

«Падчас сённяшняга выпрабавання з гарачым агнём мы сутыкнуліся з анамаліяй. Усе супрацоўнікі ў бяспецы. Мы будзем паведамляць аб навінах, як толькі даведаемся больш», — гаворыцца ў заяве Blue Origin.

Кампанія Blue Origin павінна была запраўіць ракету палівам у чацвер увечары перад запланаваным выпрабавальным запускам рухавікоў ракеты.

Кампанія Blue Origin, якая належыць заснавальніку Amazon Джэфу Безасу, мінулым месяцам паспяхова запусціла сваю трэцюю ракету New Glenn.

Гэтую ракету рыхтавалі да запуску чацвёртай місіі New Glenn ужо 4 чэрвеня, каб запусціць 48 спадарожнікаў для інтэрнэт-сэрвісу Amazon Leo, які канкурыруе са Starlink Ілона Маска.

Як вядома, кампанія Blue Origin займаецца распрацоўкай ракет, касмічных караблёў і тэхналогій для субарбітальных і арбітальных палётаў. Найбольш вядомыя праекты Blue Origin — ракета New Shepard для турыстычных палётаў у космас і цяжкая ракета New Glenn для запуску спадарожнікаў.

Blue Origin з'яўляецца адным з галоўных канкурэнтаў SpaceX у прыватнай касмічнай галіне і супрацоўнічае з NASA ў месяцовых і касмічных праграмах.