У Светлагорску сям'я прыдумала дачцэ нязвыклае імя

• 29.05.2026, 10:50

Некаторым родзічам давялося запісаць яго ў блакнот.

У Светлагорску ў сям'і Анастасіі і Міхаіла Ягоравых нарадзілася трэцяе дзіця. Дзяўчынку назвалі нязвыклым імем — Леонелія. Але не ўсе родзічы змаглі запомніць імя з першай спробы, паведаміла Галоўнае ўпраўленне юстыцыі Гомельскага аблвыканкама.

Першапачаткова Анастасія падбірала імя са значэннем «львіца», бо сама Леў па гараскопе. «Львіныя» імёны атрымалі і старэйшыя сыны — Леанід і Леў. Падчас цяжарнасці знайшоўся варыянт Леонэлія, але гучанне не спадабалася.

«Мы вырашылі замяніць адну літару, прыдумалі для дачкі сваё нязвыклае імя. Раней мы яго не сустракалі і баяліся праблем пры рэгістрацыі ў ЗАГСе. На шчасце, усё склалася ўдала», — распавяла Анастасія.

Імя дзяўчынкі ніхто з родзічаў не ведаў да самых родаў.

«Першай рэакцыяй было здзіўленне, бо пра Леонелію раней ніхто не чуў. А бабуля нават запісала імя ў блакнот, каб не забыць, як завуць унучку», — падзялілася мама.