Кожны трэці расіянін перайшоў у рэжым эканоміі

• 29.05.2026, 17:04

Яны скарацілі выдаткі на прадукты харчавання, лекі, а таксама адзенне і абутак.

Пагаршэнне сітуацыі ў эканоміцы вымушае ўсё больш расіян скарачаць выдаткі і пераходзіць да «разумнага спажывання», піша The Moscow Times.

У 2026 годзе частка пакупнікоў, якія дэманструюць «асэнсаваны» падыход да выбару тавараў, павялічылася да 37% супраць 32% годам раней. Пры гэтым у звычайных крамах пачалі эканоміць 40,2% расіян, а ў інтэрнэце — 28,2%. Пра гэта гаворыцца ў сумесным даследаванні НДУ ВШЭ і дыскаўнтара «Чыжык», вынікі якога прыводзяць «Ведамасці».

Сярод людзей старэйшых за 65 гадоў у рэжым эканоміі перайшлі 46,7% апытаных. У групе 55–64 гадоў частка такіх за год вырасла з 37,1% да 44%, сярод грамадзян 45–54 гадоў — з 33,2% да 35,7%, а сярод рэспандэнтаў 25–34 гадоў — з 22,6% да 30%. У невялікіх населеных пунктах і сельскай мясцовасці частка тых, хто эканоміць, дасягае адпаведна 37,8% і 40,7%, тады як у гарадах-мільённіках — 32,6%. Таксама за год павялічылася колькасць расіян, якія сталі часцей планаваць пакупкі, — з 60% да 62%. Пры гэтым выключна на нізкую цану пры куплі арыентуюцца 43% расіян, а 65% не гатовыя пераплачваць за вядомыя брэнды.

Змена паводзін грамадзян звязаная са зніжэннем спажывецкай упэўненасці да мінімальных значэнняў з 2023 года, кажа старшы аналітык «БКС Мир инвестиций» Марына Кічкайло. Паводле яе слоў, найбуйныя рытэйлеры ўжо адзначаюць большую адчувальнасць пакупнікоў да цэн, акцый і зніжак, а таксама павелічэнне попыту на ўласныя гандлёвыя маркі. Для людзей з фіксаванымі або больш абмежаванымі даходамі «разумнае спажыванне» з’яўляецца спосабам утрымаць звыклы ўзровень жыцця, дадаў генеральны дырэктар Агенцтва трансфармацыі і развіцця эканомікі (АТРЭ) Уладзіслаў Анішчанка.

Расіяне перайшлі ў рэжым эканоміі летась на фоне рэзкага запаволення эканомікі і пачалі скарачаць выдаткі на прадукты харчавання, лекі, а таксама адзенне і абутак. Нягледзячы на тое, што, паводле дадзеных ЦБ, з пачатку вайны дзве трэці расіян павялічылі рэальныя даходы, а ў кожнага пятага яны выраслі ў паўтара раза, частка грамадзян, якім не хапае грошай на ежу, у апытаннях не змяншаецца і складае 31%, выплывае з апытання Gallup.

Сваёй чаргой даследаванне «Роміра» паказала, што 58% спажыўцоў свядома адмаўляюцца ад пэўных тавараў, якія набывалі раней, 57% спрабуюць знайсці аналагі ў больш нізкіх цэнавых катэгорыях, а амаль палова (46%) імкнуцца як мага радзей хадзіць у крамы.